Хитойда заводдаги бахтсиз ҳодиса оқибатида сон қисмидан тўлиқ узилиб кетган иккала оёғи муваффақиятли қайта уланган 51 ёшли эркак қарийб 20 ойлик даволанишдан сўнг яна юришни бошлади. Бу ҳақда “Чинапресс” хабар берди.

Маълум қилинишича, эркак тахминан 20 ой аввал заводда ишлаётган вақтида юз берган бахтсиз ҳодиса оқибатида иккала оёғидан сон қисми даражасида тўлиқ айрилган. Шифокорлар унинг оёқларини қайта улаш учун қарийб 8 соат давом этган мураккаб жарроҳлик амалиётини ўтказган.

Сучжоу шаҳридаги Жуйхуа ортопедия шифохонаси травматология бўлими маълумотига кўра, мазкур амалиёт дунёда сон қисмидан тўлиқ узилган иккала оёқни бир вақтнинг ўзида муваффақиятли қайта улаш бўйича илк ҳолат сифатида қайд этилган.

Шифокорларнинг таъкидлашича, бемор ҳозирда махсус юриш мосламаси ёрдамида хона ичида мустақил ҳаракатлана олади. У кундалик эҳтиёжларининг аксариятини ўзи бажармоқда. Шунингдек, оёқлардаги сезувчанлик ҳам аста-секин тикланиб, тўпиқдан юқори қисмларда сезиш қобилияти қайта пайдо бўлган.

Тиббиёт ходимлари беморнинг аҳволи ижобий томонга ўзгараётганини қайд этиб, у келгуси бир-икки йил ичида таянч воситаларисиз мустақил юриши мумкинлигини билдирган.

Аввалроқ Рочестер университети олимлари яланғоч мол-каламушнинг қаришдан ҳимояланишига ёрдам берувчи генетик механизмларни бошқа ҳайвонларга қисман кўчиришга муваффақ бўлгани ҳақида хабар берилган эди.