Ўзбекистонда автобус, троллейбус ва трамвайларда йўлкира тўламай юрган йўловчиларга нисбатан жарималарни ошириш таклиф қилинмоқда.

Транспорт вазирлиги маълумотига кўра, тегишли таклифлар ишлаб чиқилиб, Қонунчилик палатасига киритилган.

Таклифга кўра, йўлкирани биринчи марта тўламаган йўловчига БҲМнинг 0,5 баравари миқдорида, яъни 2026 йил 1 сентябрдан 220 минг сўм жарима солиниши мумкин. Ҳуқуқбузарлик такроран содир этилса, жарима БҲМнинг 1 бараваригача, яъни 440 минг сўмгача оширилиши назарда тутилмоқда.

Айни пайтда амалдаги тартиб бўйича жамоат транспортида чиптасиз юриш учун БҲМнинг 0,1 баравари — 41 200 сўм миқдорида жарима белгиланган.

Тошкент шаҳар йўловчи ташишни мониторинг ва назорат қилиш давлат муассасаси директори Муҳаммаджон Қаҳҳоровнинг маълум қилишича, 2026 йилнинг дастлабки етти ойида 82 мингдан ортиқ йўловчининг йўлкира тўламагани аниқланган. Ҳуқуқбузарлардан 2 миллиард сўмдан ортиқ жарима ундирилган.

Шунингдек, 2026 йил 1 сентябрдан йўловчиларнинг автобусга бевосита чиқиш вақтида йўлкира тўлаши бўйича янги тартиб жорий этилиши белгиланган. Йўлкирани тўламаган йўловчилар чиптасиз юрган деб ҳисобланади ва уларга нисбатан маъмурий жарима қўлланади.