Ўзбекистоннинг бир қатор ҳудудларида электр энергиясидан ноқонуний фойдаланиш билан боғлиқ йирик қоидабузарликлар аниқланди.

Бош прокуратура ҳузуридаги Департамент маълумотига кўра, терговга қадар текширувлар давомида тадбиркорлик субъектлари ва фуқароларнинг электр тармоқларига ўзбошимчалик билан уланиб, электр энергиясидан ноқонуний фойдалангани аниқланган.

Жумладан:

— Сирдарё туманида “С.У.” фермер хўжалиги масъуллари сув насосларини электр тармоғига тўғридан-тўғри улаб, 1,1 млрд сўмлик зарар етказган;

— Жиззах вилояти Шароф Рашидов туманида “Ф.З.Б.” МЧЖ сув насосларининг ноқонуний уланиши оқибатида 1,561 млрд сўмлик зарар етказилган;

— Наманган шаҳрининг Давлатобод туманида “С.Г.” МЧЖ томонидан 558,6 млн сўмлик;

— Тошкент шаҳри Олмазор туманида “Г.Б.” МЧЖ масъуллари томонидан 272,6 млн сўмлик электр энергияси ноқонуний ишлатилгани аниқланган.

Шунингдек, Фарғона вилояти Ўзбекистон туманидаги фермер хўжалигида 217,8 млн сўмлик, Учқўрғон туманидаги балиқчилик хўжалигида 112 млн сўмлик, Қорақалпоғистон Республикаси Хўжайли туманидаги ғишт ишлаб чиқариш заводида 103,6 млн сўмлик ҳамда Наманган шаҳрида фуқаро томонидан 100,1 млн сўмлик электр энергиясидан ноқонуний фойдаланилгани маълум бўлган.

Аниқланган ҳолатлар натижасида электр таъминоти корхоналарига етказилган умумий зарар салкам 4 млрд сўмни ташкил этган.

Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилган. Ҳозирда тергов ҳаракатлари олиб борилмоқда.