Эфиопиянинг жанубида хавфли вирус тарқала бошлади. Мутахассисларнинг айтишича, вирусдан ўлим даражаси 25–80 фоизгача етади. Бу ҳақда Африка касалликларни назорат қилиш ва олдини олиш марказларига таяниб, The Guardian хабар берди.

Марбург — энг хавфли геморрагик вируслардан бири бўлиб, беморда кучли қон кетиши, юқори иситма, қусиш ва диарея каби оғир аломатларни келтириб чиқаради. Унинг инкубация даври 21 кунгача давом этиши мумкин.

Жаҳон соғлиқни сақлаш ташкилоти раҳбари Тедрос Аданом Гебреесус мамлакатда ҳозирча тўққизта касалланиш ҳолати аниқланганини маълум қилди. Эфиопия миллий лабораторияси вируснинг мавжудлигини тасдиқлаган, у илгари Шарқий Африкада қайд этилган штаммларга ўхшаш экани айтилмоқда.

Мамлакат расмийлари Жинка ҳудудида эпидемиологик суриштирув ва вирус тарқалишини жиловлаш чораларини бошлаб юборган. Йил бошида Танзанияда Марбург вируси тарқалиши оқибатида 10 киши вафот этган, март ойида эса эпидемия тўхтатилган. Руандада 2024 йилда ушбу вирусдан 15 киши ҳалок бўлганди.

Вирусга қарши тайёр вакцина ҳали мавжуд эмас. Бироқ симптомларни енгиллаштириш ва сувсизланишнинг олдини олиш беморларнинг омон қолиш эҳтимолини оширади.

• Afrika
• Вирус