Шавкат Мирзиёев томонидан 11 февраль куни имзоланган қонун билан Маъмурий жавобгарлик тўғрисидаги кодексга қатор ўзгартиришлар киритилди.

Ҳужжатга мувофиқ, эндиликда халқаро ва шаҳарлараро автомобиль ташувларини амалга оширишда ҳайдовчиларнинг меҳнат ва дам олиш режимини бузганлик учун жавобгарлик белгиланади. Бундай ҳуқуқбузарлик БҲМнинг етти баравари миқдорида (2 миллион 884 минг сўм) жарима солишга сабаб бўлади. Мазкур талаб М3 ва Н3 тоифали автотранспорт воситаларида йўловчи ва юкларни 400 километр ва ундан ортиқ масофага ташиш жараёнларига татбиқ этилади.

Шунингдек, 125-моддага киритилаётган ўзгартиришларга кўра, халқаро ва шаҳарлараро ташувларни рақамли назорат ускуналарисиз (тахографсиз), носоз тахограф билан ёки уни ўчириб қўйган ҳолда амалга ошириш, шунингдек, ҳайдовчининг тахограф картасисиз ҳаракатланиши ҳам жавобгарликка сабаб бўлади.

Амалдаги қонунчиликда шаҳарлараро ва халқаро йўловчи ташишни амалга ошираётган автобусларда тахограф (назорат қурилмаси) ўрнатилган. Бу қурилма ҳайдовчиларнинг иш вақти, дам олиш вақти, тезлик ва масофани ёзиб боради. Қурилмани ўчирган ҳолда автомобиль бошқарганлик учун жавобгарлик мавжуд. Бироқ ушбу қурилмадаги маълумотларга асосан ҳайдовчининг меҳнат ва дам олиш режимига бўйсунмагани юзасидан жавобгарлик белгиланмаганди.

Шу билан бирга, ҳайдовчининг иш вақти давомийлиги 9 соатдан ортиқ ёки йўналиш масофаси 400 километр ва ундан ортиқ масофага йўловчи ва юкларни ташишда ҳайдовчиларнинг меҳнат ва дам олиш режими Транспорт назорати инспекцияси томонидан назорат қилиб борилади.

Янги тартибга кўра, ташишлар хавфсизлигини таъминлаш бўйича қоида ва талабларни бузган мансабдор шахслар ҳам маъмурий жавобгарликка тортилади. Қонун билан бир хил тоифадаги ҳуқуқбузарликлар учун турлича жарима қўлланилишининг олдини олиш ҳамда жавобгарликни аниқ белгилаш мақсад қилинган. Ҳужжат 2026 йил 10 майдан кучга киради.