Туркия президенти Ражаб Тоййиб Эрдўғaн Нью-Йоркда тадбиркор ва Теslа компаниясининг эгаси Илон Маск билан учрашди. Бу ҳақда Туркия президенти ҳузуридаги Жамоатчилик билан алоқалар бошқармаси Х ижтимоий тармоғида хабар берди.

“Президентимиз жаноб Ражаб Тоййиб Эрдўғaн Нью-Йоркдаги Турклар уйида Теslа ва SpaceХ асосчиси Илон Маскни қабул қилди”, – дейилади хабарда.

Учрашувда президент тадбиркорни Туркияда еттинчи Теslа электромобил ишлаб чиқариш заводини очишга чақирган. Туркия раҳбари Туркиянинг космик дастури доирасида мамлакатнинг SpaceХ билан ҳамкорлиги потенциал ривожланишини таъкидлаган ва Маскни сентябрь ойи охирида Туркиянинг Измир шаҳрида бўлиб ўтадиган технология кўргазмасида иштирок этишга таклиф қилган.

Маск учрашувга ўзининг Х Æ А-12 исмли ўғлини ҳам  олиб келган, буни фотосуратлар ва видеоларда кўриш мумкин. Учрашув атиги 45 дақиқа давом этган.

Қайд этилишича, президент Маскга Туркияни рақамлаштириш концепцияси ва сунъий интеллект соҳасидаги миллий стратегия ҳақида ҳам гапириб берган.

Бу Туркия раҳбари ва тадбиркорнинг биринчи учрашуви эмас. Ўтган йил охирида улар Қатарда жаҳон чемпионатининг финал учрашувида тўқнаш келишганди. Суҳбат тафсилотлари номаълум.

• Эрдоған
• Ilon_Mask
• Nyu-York
• SpaceX
• Tesla
• Туркия