Самарқандда бўлиб ўтган ЮНЕСКО конференциясида мисрлик олим ва собиқ вазир Холид Аҳмад Ал-Анани 179 овоздан 172 тасини қўлга киритиб, тўрт йиллик муддатга бош директор этиб сайланди. У 15 ноябрь куни амалдаги раҳбар Одри Азуленинг ўрнини эгаллайди.

54 ёшли Ал-Анани ЮНЕСКО тарихида араб мамлакатидан сайланган илк бош директор ва Африка қитъасидан бу лавозимни эгаллаган иккинчи шахс бўлди. Ундан аввал бу лавозимни сенегаллик Амаду Махтар МЪБоу 1974–1987 йилларда бажарган эди.

Холид Ал-Анани Мисрнинг Ҳелван университетида мисршунослик профессори бўлиб, бу соҳада 30 йилдан зиёд фаолият юритган. У университетда туризм ва меҳмонхона бошқаруви факультетида декан ўринбосари, Очиқ таълим маркази директори ва кафедра мудири лавозимларида ишлаган. Олим Франциянинг Монпеле шаҳридаги Пол Валери университетида фалсафа доктори даражасини олган. У шу ерда бир неча бор меҳмон профессор сифатида ҳам дарс берган.

2014–2016 йилларда Миср цивилизацияси миллий музейини, 2015–2016 йилларда Қоҳирадаги Миср музейини бошқарган. Кейинчалик у 2016–2022 йилларда Мисрнинг қадимий ёдгорликлар ва туризм ишлари бўйича вазири сифатида фаолият кўрсатган. 2024 йилда эса Жаҳон сайёҳлик ташкилоти томонидан маданий туризм бўйича махсус элчи сифатида тайинланган.

Маълумот учун, ЮНЕСКО Бош конференциясининг 43-сессияси 13 ноябргача давом этади.

• Конференция
• Самарқанд
• ЮНЕСКО
• direktor
• saylov