Кипрнинг Пафос шаҳрида ўтказилаётган мукофот жамғармаси 1 миллион еврони ташкил этувчи Номзодлар турнирида 1 очколик тафовут билан Жавоҳир Синдаров пешқадамлик қилмоқда.

1 апрель куни ўтказилган 4-тур баҳсларида ўзбекистонлик гроссмейстер америкалик Фабиано Каруанани мағлуб этди. Америклик гроссмейстер соатида 48 сония вақт қолганда таслим бўлди. Шу тариқа Синдаров очколари сонини 3,5 тага етказиб олиб, мусобақада яққол пешқадамга айланиб олди. Бунгача Каруанада ҳам 2,5 очко мавжуд эди. Шунингдек, бу ғалаба орқали Синдаровнинг ФИДЕ рейтингидаги очколари 2759,2 тага етиб, онлайн жадвалда 6-ўринга кўтарилиб олди. 

Эртага, 3 апрель куни 5-турда Жавоҳир Синдаров қора доналарда яна бир америкалик гроссмейстер Ҳикару Накамурага қарши баҳс олиб боради. 

Маълумот учун, Синдаров Жаҳон тожи учун ўйнаш имкониятини берадиган турнирда иштирок этаётган биринчи ўзбек шахматчиси ҳисобланади. Ўн тўрт турдан иборат мазкур турнир ғолиби жаҳон тожи учун ҳиндистонлик Гукеш Доммаражуга қарши дона суради.

• Кипр
• Шахмат
• Спорт