The Guardian газетасининг ёзишича, Венесуэладаги воқеалар АҚШ сиёсатининг “Путинлашуви”га олиб келмоқда. Трамп энди халқаро қоидаларни четлаб ўтишга уринмаяпти, балки уларни очиқчасига бузмоқда ва бунинг оқибатлари Каракасдан анча узоқларга етиб бормоқда.

“Мадуронинг қўлга олиниши режаси иш берди ва айнан шу ҳолат энг хавотирли сигнал ҳисобланади. Венесуэладаги операциянинг муваффақияти Трампнинг ўзини жазодан холи ҳис қилиш ишончини кучайтирди ва ҳудудлар ҳамда ресурслар устидан назорат ўрнатиш йўлида кейинги куч ишлатишга йўл очди. Вашингтоннинг мақсади адолат ёки демократия эмас, балки Венесуэла нефтига бўлган қизиқиш бўлиб, бу ҳақда Трампнинг ўзи ҳам очиқ гапирган”, – дейилади мақолада.

The Guardian маълумотларига кўра, юз берган воқеалар аллақачон Эрон ва Дания каби давлатлар ҳукуматларида хавотир уйғотмоқда. Сўнгги кунларда Трамп АҚШ Эрондаги норозилик намойишчиларини ҳимоя қилишга тайёр эканини билдирган. Шунингдек, унинг маъмурияти Гренландияни “ҳар қандай восита ёрдамида” эгаллаш билан таҳдид қилишда давом этган. Ўтган ой Дания ҳарбий разведкаси илк бор АҚШни “хавфсизликка таҳдид” сифатида расман тилга олди.

Бундан ташқари, шанба кунги матбуот анжуманида Трамп бу рўйхатга Кубани ҳам қўшиб, “бу давлатдаги ҳолат Венесуэладагига жудаям ўхшаш” эканини ва АҚШ “Куба халқига ёрдам бермоқчи” эканини айтди. АҚШ Давлат котиби Марко Рубио эса Венесуэладаги воқеалардан сўнг Куба “хавотирланиши керак”лигини билдирди.

“Дунё тез суръатларда қоидалар тизимидан таъсир доиралари рақобати томон силжимоқда ва бунда ҳал қилувчи омил ҳарбий куч бўлиб бормоқда”, – дея хулоса қилади нашр.

• АҚШ
• Сиёсат