Халқаро футбол федерацияси (ФИФА) Ғазо секторидаги ҳолат туфайли ташкилот низомини бузгани учун Исроилни барча мусобақалардан четлаштириши мумкин. Бу ҳақда Reuters нашри маълум қилди.

Манбанинг хабар беришича, Фаластин футбол ассоциацияси (ПФА) 2024 йилнинг май ойида Исроилни дисквалификация қилиш таклифини киритган. ФИФА бу масалани июль ойида ўз кенгашининг навбатдан ташқари йиғилишида кўриб чиқишга ваъда берган.

Шунингдек, Осиё футбол конфедерацияси ҳам Исроилга қарши шикоятни қўллаб-қувватлаган.

Маълумот учун, Миллатлар лигасининг 2024/25-йилги мавсумида Исроил Белгия, Италия ва Франция терма жамоалари билан бирга А лигасининг иккинчи гуруҳида иштирок этади. Аввалроқ эса Белгия Исроил билан футбол ўйинини ўтказишдан бош тортаётгани хабар қилинганди.

Эслатиб ўтамиз, 2022 йилнинг баҳорида ФИФА ва Европа футбол ассоциациялари иттифоқи (UEFA) Россия терма жамоасини, шунингдек, Россиянинг барча клубларини ушбу ташкилотлар назоратидаги барча мусобақаларда иштирок этишдан четлаштиришга қарор қилган эди.

• FIFA
• Isroil
• УЕФА