Финляндия Украинадаги ҳарбий ҳаракатлар туфайли Россияга қарши жорий қилинган санкциялар доирасида Россиянинг 187 миллион евро (203 млн доллар) миқдоридаги активларини музлатиб қўйди.

“Булар кўчмас мулк, акциялар, автомобиллар, яхталар, самолётлар. Турли хил қимматбаҳо мулкларни ташкил этади”, – деди мамлакат ташқи ишлар вазирлиги матбуот котиби Пиа Сааривара.

Ўтган йилнинг кузида Финляндияда Россия активларининг мусодара қилиниши бир неча ўнлаб ташкилотларга таъсир қилгани ҳақида хабар берди. Мусодара қилинган мол-мулк рўйхатига номоддий активлар, кўчмас мулк, саноат хомашёси ва транспорт воситалари киритилган.

2022 йил октябрь ойида Финляндия Мудофаа вазирлиги зарурат туғилганда, агар у мамлакат хавфсизлиги учун муҳим ҳудудда жойлашган бўлса, расмийлар россияликлар томонидан сотиб олинган мулкни экспроприация қилиши мумкинлигини тан олди. Агентлик ҳозирда бундай чоралар кўриб чиқилмоқдами ёки йўқлигига аниқлик киритмаган, бироқ “биринчи марта рад этиш ҳуқуқи бир неча бор қўлланилганини” таъкидлаган.

Финляндия ЕИ аъзоси сифатида Россияга қарши санкцияларга қўшилган. Ўтган февраль ойидан бери Брюссель тўққиз тур чекловларни жорий қилган ва энди янгилари устида ишламоқда. Европа Кенгаши президенти Чарльз Мишель “санкциялар ҳақидаги ҳар бир мунозара аввалгисига қараганда анча қийин” эканини тан олди. Москва бу чекловчи чораларни ноқонуний, деб билади.

Россия Хавфсизлик кенгаши эса “мамлакат активларининг музлатилиши тарихдаги энг катта ўғирликлардан бири” эканини айтди.

Декабрь ойида Финляндиядаги Россия савдо вакили Антон Логинов Хелсинки санкцияларнинг миллий иқтисодиётга таъсирини етарлича баҳоламаганини айтди. Унинг сўзларига кўра, келгуси йилда Россия билан савдо айланмаси 4,5 миллиард еврогача камайиши мумкин. 2021 йилда Россия ва Финляндия ташқи савдо айланмаси, Росстат маълумотларига кўра, 13 миллиард доллардан ортиқни ташкил қилган.

• Finlyandiya
• Россия
• Санкция