Туркияда ички ишлар вазирлиги томонидан ўтказилган кенг кўламли НАРКОКАПАН-Анкара операцияси мамлакат тарихидаги энг йирик гиёҳванд моддалар савдосига қарши тадбир сифатида қайд этилди. Операция натижасида 525 гумонланувчи ҳибсга олинган.

Ички ишлар вазири Али Ерликаянинг айтишича, операция 17 апрель куни тонгги соат 05:00 да бошланган. Унда 4768 нафар полициячи, шу жумладан 1461 нафар махсус кучлар, 40 та хизмат итлари, 4 та дрон ва авиация ёрдами иштирок этган.

Ҳуқуқ-тартибот идоралари бир вақтнинг ўзида 626 та манзилда тинтув ўтказди, бу эса операцияни мисли кўрилмаган даражада кенг қамровли қилган.

Али Ерликая ижтимоий тармоқлардаги саҳифасида: “Биз Анқарада гиёҳванд моддалар савдогарлари устидан энг йирик зарбани бердик”, – дея баёнот берган.

• Туркия