Франция Президенти Эммануэл Макрон мамлакатнинг янги Бош вазири сифатида Себастян Лекорнюни тайинлади.

“Reuters” ахборот агентлигининг маълумотларига кўра, Себастян Лекорню Макроннинг кўп йиллик иттифоқчиси ҳисобланади ва бизнесни қўллаб-қувватловчи позицияга эга. Бу эса Франция раҳбарининг бизнес учун солиқларни камайтириш ва нафақа ёшини оширишга қаратилган иқтисодий ислоҳотларни давом эттириш ниятидан далолат беради.

Президент Макрон янги Бош вазирга бюджет ва давлат сиёсатининг муҳим масалалари бўйича сиёсий кучлар билан музокаралар ўтказиб, келишувларга эришиш вазифасини юклади.

Маълум қилинишича, Лекорню аввал, Франция мудофаа вазири лавозимида ишлаган. У хавфсизлик харажатларини ошириш ва Украинага Европа Иттифоқининг қўллаб-қувватлаш стратегиясини шакллантиришда ҳам фаол иштирок этган.

Янги ҳукумат олдида турган асосий вазифалардан бири — мамлакат молиявий барқарорлигини таъминлаш ва дефицитни камайтиришга қаратилган 2026-йилги бюджет лойиҳасини ишлаб чиқиш ҳисобланади.

Эслатиб ўтамиз, 8 сентябрь куни Франция Бош вазири Франсуа Байру парламентдаги овоз бериш жараёнида мағлубиятга учраганидан сўнг истеъфога чиққан эди.

• Бош вазир
• Fransiya
• Макрон
• Президент