“Катта еттилик” давлатлари етакчилари Хиросимадаги атом бомбаси портлаши қурбонларига бағишланган мемориал музейга бориб, хотира китобига эслатма қолдиришди. 

Унда Япония бош вазири Фумио Кисиданинг “Мен G7 саммитининг тарихий воқеасини раис сифатида қабул қиляпман, бошқа етакчилар билан бирга ядровий қуролсиз дунёга интилиш учун бу ерга йиғилдим”, – деб ёзганини кўриш мумкин.

“Биз ҳис-туйғулар ва ҳамдардлик билан Хиросима қурбонлари хотирасига ҳурмат бажо келтириб, тинчлик учун ҳаракат қилишимиз керак – бу курашишга арзийдиган ягона жанг”, – дея ёзган Франция президенти Эммануэль Макрон.

АҚШ президенти Жо Байден эса “Музей воқеалари барчамизнинг тинч келажакни қуришга интилишимизни эслатиб турсин. Келинглар, дунёни ниҳоят ва абадий ядровий қуролдан озод қила оладиган кун сари биргаликда олға боришда давом этайлик. Имонни сақланглар!”, – дея қайд этиб қўйган.

“Канада кўплаб ҳалок бўлганлар, атом бомбаси қурбонларининг беҳисоб қайғуси (ҳибакуша), Хиросима ва Нагасаки аҳолисининг чексиз изтироблари учун ҳурмат бажо келтирмоқда. Сизнинг ҳикоянгиз бизнинг жамоавий онгимизда абадий муҳрланган", – дейилади Канада Бош вазири Жастин Трюдонинг инглиз ва француз тилларида ёзилган эсдалигида.

Германия канцлери Олаф Шольц: “Бу жой ақл бовар қилмайдиган азоб-уқубатларга сабаб бўлмоқда. Бугун бу ерда ҳамкорларимиз билан биргаликда тинчлик ва эркинликни қатъият билан ҳимоя қилишга содиқлигимизни яна бир бор тасдиқлаймиз. Ядро уруши ҳеч қачон бошланмаслиги керак”.

"Бугун биз тўхтаб, ибодатда қоламиз. Бугун зулмат ғолиб чиқмаганини эслаймиз. Бугун умид келажагини биргаликда қуриш учун ўтмишни эслаймиз”, – дея ёзган Италия бош вазири Гиорги Мелони.

“Шекспир айтганидек, “Умумсизликка эркинлик беринг”, ҳатто сўзлар ҳам ядровий чақнашда сўниб кетади. Хиросима ва Нагасаки аҳолисининг даҳшатини ва азобини тасвирлашга сўз йўқ. Лекин бутун қалбимиз билан айтамиз, бошқа ҳеч қачон ядровий уруш бўлмайди”, – дея қайд этган Британия Бош вазири Риши Сунак.

Маълумки, 1945 йил 6 августда Америка самолётлари Хиросима шаҳрини, уч кундан сўнг эса Нагасакини бомбардимон қилди. Натижада 210 мингдан ортиқ одам ҳалок бўлган ёки бедарак йўқолган, икки юз мингга яқин киши радиоактив нурланиш таъсирига учради. Хиросима ва Нагасакидаги атом бомбалари инсоният тарихида ядро қуролидан жанговар фойдаланишнинг ягона намунаси ҳисобланади.

Эслатиб ўтиш мумкин, жорий йилги G7 саммитига Япония мезбонлик қилмоқда. Саммит 19-21 май кунлари Хиросима шаҳрида бўлиб ўтади. “Катта еттилик” давлатларидан ташқари Ҳиндистон, Австралия, Бразилия, Жанубий Корея, Вьетнам, шунингдек, Жануби-Шарқий Осиё давлатлари уюшмасига раислик қилувчи Индонезия, Тинч океани ороллари форумига раислик қилувчи Кук ороллари ва Африка Иттифоқига раислик қилувчи Комор ороллари делегациялари таклиф этилган.

Шунингдек, БМТ, Халқаро энергетика агентлиги, Халқаро валюта жамғармаси, Иқтисодий ҳамкорлик ва тараққиёт ташкилоти, Жаҳон банки, Жаҳон соғлиқни сақлаш ташкилоти ва Жаҳон савдо ташкилотига ҳам таклифнома юборилган.

• G7
• Япония
• саммит