Британиянинг Financial Times нашрининг ёзишича, АҚШ президенти Доналд Трамп 17 октябрь куни Оқ уйда Украина раҳбари Володимир Зеленский билан ўтказган музокараларда Россия президенти Владимир Путин таклиф қилган шартларни қабул қилишни талаб қилган. Манбаларга кўра, Трамп Зеленскийни “Россияга бутун Донбассни бериш”га чақирган ва агар Киев бунга рози бўлмаса, “Путин Украинани йўқ қилади”, деб таҳдид қилган.

Газета маълумотига кўра, музокара бир неча марта “баҳс ва бақир-чақирга” айланган, Трамп “тўхтовсиз ҳақоратли сўзлар ишлатган”. АҚШ президенти Украина фронти хариталарини столдан отиб юборган ва “бу қизил чизиқлардан чарчадим, қаерлигини ҳам билмайман”, деб айтган.

Financial Times’нинг ёзишича, Трамп Путин билан бир кун аввалги телефон суҳбатда эшитган гапларни деярли сўзма-сўз такрорлаган, ҳатто улар ўзининг аввалги баёнотларига зид бўлса ҳам. Европа манбаларига кўра, у Зеленскийга “агар келишув тузмасанг, йўқ бўласан”, деган ва Россия иқтисодиёти “жуда яхши ҳолатда” эканини таъкидлаган.

16 октябрь куни The Washington Post нашри Путин Трамп билан суҳбатда Украина Донеск устидан тўлиқ назоратни топшириш урушни тўхтатиш шарти сифатида қўйгани ҳақида ёзган эди. Эвазига Россия Запороже ва Херсон вилоятларининг ҳали босиб олинмаган қисмларига бўлган даъводан воз кечишга тайёрлигини билдирган.

Financial Times нашрининг қайд этишича, Трампнинг Путин фикрларини очиқча такрорлаши Украина бўйича АҚШ позициясининг беқарорлигини ва Россиянинг талабларига мойиллигини кўрсатиб берган.

• АҚШ
• Трамп
• Украина
• Зеленский