Ғарб матбуотига кўра, Габон президенти Али Бонго Ондимбанинг қаерда эканлиги 26 августдан бери номаълумлигича қолмоқда.

“Охирги марта шанба куни бўлиб ўтган президентлик сайловида овоз бериш учун сайлов участкасига келганида омма олдида кўриниш берган Али Бонго Ондимбанинг ҳозирда қаерда эканлиги ҳақида маълумотлар йўқ”, – дейилади Reuters хабарида.

Бундан ташқари, агентлик Габон ҳукумати аъзолари ҳам ҳозирча вазиятга изоҳ бермаганини таъкидлади.

Чоршанба куни эрталаб Габоннинг амалдаги президенти Али Бонго Ондимба сайловларда 64,2 фоиз овоз билан ғалаба қозонгани маълум бўлди. Мухолифат вакили академик Алберт Ондо Осса 30,7 фоиз овоз олган.

Кейинроқ Габон ҳарбийлари телевидение орқали сайлов натижалари бекор қилингани ва ҳокимият институтлари тарқатиб юборилгани ҳақида эълон қилди. Улар мамлакатдаги режимга барҳам беришларини ҳам эълон қилдилар.

Ҳарбийлар қайси сиёсий кучни қўллаб-қувватлаётгани ҳозирча аниқ эмас.

Шунингдек, улар мамлакатнинг халқаро ҳамжамият олдидаги мажбуриятларини бажаришга ваъда беришди. Габон ОПЕК+ нефт экспорт қилувчи мамлакатлар аъзоси ҳисобланади.

• Давлат тўнтариши
• Габон