Ҳирот шаҳридаги аёллар кафесининг фаолияти “Толибон” томонидан тўхтатилган. Бу ҳақда Hasht-э Subh Daily хабар бермоқда.

Афғонистон муваққат ҳукуматининг Ҳиротдаги штаб-квартираси кафе ёпилганини тасдиқлаган. Хабарларга кўра, аниқ бир сабабсиз кафе муҳрлаб қўйилган.

Ўзини “Толибон” деб таништирган гуруҳ агентлари аввалроқ кафеларни ёпиш билан таҳдид қилган. Улар кафедаги аёллар ҳижобга риоя қилмаслиги, мусиқа тинглашини важ сифатида кўрсатган.

“Толибон” ҳаракати аёлларга эркаклар бўлган ресторан ва кафеларга боришни тақиқлаганидан сўнг, Ҳирот шаҳрида фақат аёлларга хизмат кўрсатадиган бешта кафе очилган эди.

Тадбиркорлар овқатланиш нуқталарининг ёпилиши 7 минг доллардан 22 минг долларгача зарар келтиришини айтмоқда. Бундан ташқари, кўплаб аёллар ишсиз қолади, уларнинг аксарияти оиласининг ягона боқувчиси ҳисобланади.

Афғонистон ҳукумати сентябрда 35 моддадан иборат фазилатлар ва иллатларга оид янги қонунларни эълон қилганди. Ушбу қоидалар аёлларнинг қўшиқ айтиш ва оммавий ўқишини тақиқлайди.

• Афғонистон
• Аёллар
• Tolibon
• тақиқ