Ҳурматли абитуриентлар, азиз фарзандларим!

Эртага, 14 июлдан бошлаб юртимиз бўйлаб тест синовлари бошланади.

Республика бўйича 65 та йирик бинода, икки сменада ўтказиладиган имтиҳонларда ҳар куни 70 мингдан ортиқ абитуриент иштирок этиши режалаштирилган.

Мазкур жараёнларнинг шаффоф, адолатли ва холис ўтиши учун барча зарур ташкилий ва техник чоралар кўрилган. Сизлардан эса фақат билим, хотиржамлик ва тартиб-интизом талаб этилади.

Билимингизга ишонинг! Сизни ўқишга киритишни ваъда қилаётган шахсларга асло ишонманг. Фақат ўз меҳнатингиз, ақл-заковатингиз билан талаба бўлишга интилинг.

Имтиҳон куни шахсингизни тасдиқловчи ҳужжат асл нусхаси ва рухсатномани албатта ўзингиз билан олинг. Имтиҳон бошланишидан камида бир соат олдин белгиланган бинога етиб келишингиз муҳим. Бу сизга ўзингизни хотиржам тутиб, барча кўрсатмаларга эътибор қаратиш имконини беради.

Сизга тест синовларида катта омад, ўзингиз истаган таълим муассасасига талаба бўлиш бахтини тилайман! Юзингиз ёруғ, йўлингиз очиқ, катта ҳаётдаги илк қадамингиз қутлуғ бўлсин!

Қўнғиротбой Шарипов,

Олий таълим, фан ва инновациялар вазири

• Имтиҳон
• Мурожаат
• Oliy ta'lim, fan va innovatsiyalar vazirligi
• Вазирлик