Тадқиқот шуни кўрсатдики, ижтимоий тармоқларда танаффус қилиш аёлларнинг ўзини ўзи қадрлаши ва жисмоний ҳолатига ижобий таъсир қилади. Биринчи ўзгаришлар юз бериши учун ҳатто бир ҳафта ҳам eтарли экан.

Канададаги Ёрк университети жамоат саломатлиги факультети олимлари университетнинг 66 нафар биринчи курс талаба қизлари иштирокида тадқиқот ўтказдилар. Уларнинг ярми одатдагидек ижтимоий тармоқлардан фойдаланган, қолган ярми эса етти кун давомида турли блог платформаларидаги янгиликларни текширишдан ўзини тийган.

Барча иштирокчилар экспериментдан олдин ва кейин сўровномаларни тўлдиришди. Уларнинг таҳлиллари шуни кўрсатдики, ижтимоий тармоқларда танаффус қилган қизлар ўзларининг ташқи кўриниши ва ўзларини бошқалар назарида идрок этишларини яхшироқ баҳолай бошлаганлар.

Ижобий таъсир, айниқса, нозикликни идеаллаштирадиган ва уни гўзаллик стандарти деб ҳисоблайдиган талаба қизлар орасида қайд этилган.

Тадқиқот ташаббускорларидан бири, психология профессори Женнифер Миллснинг таъкидлашича, аёллар мода ва гўзаллик нашрларига бир неча дақиқадан бир неча соатгача вақт сарфлашган. У ерда ҳар доим янги нарса пайдо бўлади, бу эса миянинг мукофот тизимини ишга туширади ва кўпроқ томоша қилиш заруратини келтириб чиқаради, деб ёзади “Medical Xpress”.

• Аёллар
• Ижтимоий тармоқ