Исроил армияси Эроннинг Исфахон вилояти яқинида портлашлар содир бўлгани ҳақидаги хабарларга изоҳ беришдан бош тортди.

“Анадолу” агентлиги мухбирининг Эрондаги портлашлар ҳақидаги саволига Исроил армияси вакили “ҳозирча бу масалага изоҳ бермаяпти”, деб жавоб берган.

Армия департаменти матбуот хизмати аҳоли учун хавфсизлик бўйича кўрсатмаларга ҳали ҳеч қандай ўзгартириш киритилмаганини таъкидлаган.

Аввалроқ Эрон ОАВлари мамлакат Ҳарбий-ҳаво кучлари базаси жойлашган Исфахон вилояти шимоли-шарқида портлашлар гумбурлагани ҳақида ёзган эди.

Қайд этилишича, портлашлар гумбурлагани ҳақидаги хабарлардан сўнг Теҳрон, Исфахон, Шероз шаҳарлари ва қатор вилоятларда парвозлар тўхтатилган.

Америка матбуоти АҚШ расмийларига таяниб, Исроил Эрон ҳудудига ҳужум уюштирганини ёзган.

• Eron
• Isroil