Исроил ҳукумати 1967 йилдан буён амалда бўлган ҳарбий буйруқни бекор қилди. Ушбу буйруқ Ғарбий соҳилда ерларни расмий рўйхатга олишни (ерга эгалик ҳуқуқини белгилашни) тўхтатиб қўйган эди.

Халқаро кузатувчиларнинг фикрича, бу қарор ҳудудни расман Исроил таркибига қўшишнинг ҳуқуқий асоси ҳисобланади. Қарор Исроил тўлиқ ҳарбий ва фуқаролик назоратини ушлаб турган Ғарбий соҳилнинг 60 фоиз қисми, яъни C ҳудудини қамраб олади.

Эндиликда Исроил ҳукумати бу ҳудудларда кимга тегишли экани аниқ бўлмаган ерларни ўзининг “давлат мулки” сифатида расмийлаштиришни бошлайди. Ерлар давлат мулки деб эълон қилингач, у ерда яҳудий аҳоли пунктлари, йўллар ва ҳарбий инфратузилмаларни қуриш ҳуқуқий жиҳатдан осонлашади.

Аммо кўплаб оилаларда бундай расмий ҳужжатлар йўқ ёки улар фақат анъанавий келишувларга таянади. Агар эгалик исботланмаса, ер автоматик равишда Исроил давлати мулкига ўтиши мумкин.

Исроил ҳукумати бу жараёнларни амалга ошириш учун қарийб 80 миллион доллар ажратган. Режа 2026 йилдан 2030 йилгача бўлган даврни қамраб олади. Таклиф ҳукмрон коалициядаги айрим ўта ўнг қанот сиёсатчилар, жумладан адлия вазири Ярив Левин ва молия вазири Бетсалел Смотрич томонидан илгари сурилган.

Фаластин маъмурияти президенти Маҳмуд Аббос идораси баёнотида бу қарорни “жиддий кескинлашув ва халқаро ҳуқуқнинг очиқ бузилиши”, амалда эса “де-факто аннексия” деб атади.

“Халқаро ҳамжамият, айниқса БМТ Хавфсизлик Кенгаши ва АҚШни зудлик билан вазиятга аралашишга чақирамиз”, – дейилади Фаластин маъмурияти баёнотида.

Иордания Ташқи ишлар вазирлиги баёнотида халқаро ҳамжамиятни “ҳуқуқий ва ахлоқий мажбуриятларини бажаришга ва босиб олувчи куч сифатида Исроилни тўхтатишга мажбур қилишга” чақирди. Шу билан бирга, Қатар, Туркия ва Европа иттифоқининг бошқа давлатлари ҳам Исроилнинг бу қадамларини қоралади.

БМТнинг энг юқори суди 2024 йилда мажбурий бўлмаган хулосасида Фаластин ҳудудларини босиб олиш ва у ерда аҳоли пунктлари барпо этилиши ноқонуний эканини айтганди.

• Фаластин
• Isroil
• Қарор