Ғазо фуқаролик мудофааси агентлигининг маълум қилишича, пайшанба куни Фаластин ҳудудида Исроил ҳужумлари камида 13 кишининг, жумладан беш нафар боланинг ўлимига сабаб бўлди. Бу ҳужумлар сулҳга қарамай юз бермоқда.

Агентлик вакили Маҳмуд Бассалнинг маълум қилишича, Ғазонинг жанубидаги чодирга дрон зарбаси берилиши оқибатида тўрт киши, жумладан уч нафар бола ҳалок бўлган. Бундан ташқари, шимолдаги Жабалия қочқинлар лагери яқинида 11 ёшли қиз ҳалок бўлган, мактабга берилган зарба бир кишининг ўлимига олиб келган. Хон Юнус яқинида дрон зарбаси яна бир эркакни ўлдирган.

“Бугун эрталабдан буён Ғазо секторига қилинган Исроил зарбалари оқибатида ҳалок бўлганлар сони 13 нафарга етди — бу сулҳ битимининг очиқдан-очиқ бузилишидир,” — деган Маҳмуд Бассал.

Ғазо соғлиқни сақлаш идораси маълумотига кўра, сулҳ кучга кирганидан бери Исроил кучлари Ғазода камида 425 фаластинликни ўлдирган.

• G‘azo
• Isroil
• O'lim
• hujum