Исроилнинг Ғазога уюштирган ҳужуми оқибатида 30 киши ҳалок бўлди. Бу сулҳ тузилганидан кейин қурбонлар сони бўйича энг йирик зарба бўлди.

Бу ҳақда Associated Press хабар бермоқда. Ушбу рақам Исроил ва ХАМАС ўртасида ўт очишни тўхтатиш келишуви тузилганидан кейинги даврда бир суткада ҳалок бўлаётганларнинг ўртача сонидан бир неча баробар кўп.

Аввалроқ Ғазо соғлиқни сақлаш вазирлиги 2025 йил 10 октябрда келишувга эришилганидан 2026 йил 30 январгача бўлган даврда Исроил кучларининг ҳаракатлари натижасида Ғазо секторида камида 520 киши ҳалок бўлганини маълум қилганди.

Исроил мудофаа армияси матбуот хизмати зарбаларни Фаластиннинг ХАМАС ва “Исломий жиҳод” ҳаракатлари томонидан сулҳнинг бузилишига “жавоб” деб атаган. Баёнотга кўра, бир кун аввал саккиз нафар “жангари” туннеллар тизими орқали Исроил назоратидаги Рафаҳ шаҳрининг ғарбий ҳудудига кириб келган. Ғазога берилган зарбаларнинг нишонлари ХАМАС жангчилари, қурол омбори ва ишлаб чиқариш жойи ҳамда икки ракета учириш мосламаси бўлган.

Исроил зарбалари Ғазодаги кўп қаватли уй ва Хон Юнусдаги қочқинлар лагерига берилган.

• Фаластин
• Havo hujumi
• Isroil