Бугун, 25 май куни ижтимоий тармоқларда Жиззах вилоятида ичида уч нафар мактаб битирувчиси бўлган Gentra русумли машина автобусга бориб урилгани ва йўловчилардан бири вафот этгани ҳақида хабарлар тарқалди.

Мазкур вазият юзасидан Жиззах вилояти Йўл ҳаракати хавфсизлиги бошқармаси ахборот хизмати муносабат билдирди.

Суриштирув ишлари давомида Gentra русумли транспорт воситаси ҳайдовчи ва йўловчилари умумтаълим мактаби ўқувчилари бўлмагани аниқланган.

Билдирилишича, воқеа бугун, 25 май куни соат 09:15 ларда “Тошкент-Термиз”автомобил йўлида содир бўлган. 2003 йилда туғилган Навоий вилоятида яшовчи С.А. Lacetti русумли автомашинасини Самарқанд-Тошкент йўналишида бошқариб бораётиб, қайрилиб олиш қисмида 4.1.1 йўл белгисига амал қилмасдан орқага қайрилган.

Шу вақтда у Тошкент-Самарқанд йўналишда ҳаракатланиб кетаётган, 1971 йилда туғилган Тошкент вилояти Қибрай туманида яшовчи Х.Р. бошқарувида бўлган YBL613ОH русумли йўловчи ташувчи автобус йўлига чиқиб кетиб ЙТҲ содир қилган.

Оқибатда Lacetti русумли автомашина салонида бўлган 2003 йилда туғилган йўловчи олган жароҳатлари туфайли воқеа жойида вафот этган. 2004 йилда туғилган яна бир йўловчи ва автомашина ҳайдовчиси тан жароҳат олган ҳамда жонлантириш бўлимига ётқизилган.

• YTH