“Mercedes-Benz” 1956 йилда ишлаб чиқарилган ноёб “300 SLR Uhlenhaut Coupe” спорткарини сотишни ўз ичига олган махфий ким ошди савдосини ўтказди. 

“Hagerty Insider” манбаларига таяниб, номаълум харидор ушбу машина учун 135 миллион евро тўлаганини даъво қилмоқда. Шундай қилиб, модел дунёдаги энг қиммат автомобилга айланди. Бу унвон аввалроқ 1962 йилда ишлаб чиқарилган “Ferrari 250 GT” эди, бир неча йил аввал уни сотиб олган харидор 70 миллион долларнинг “баҳридан ўтган”.

Таъкидланишича, “Mercedes” аукционида жами 10 нафар таниқли автомобил коллекциячиси иштирок этган. Ғолибнинг исми айтилмаган. Норасмий маълумотларга кўра, таниқли британиялик тадбиркор ва ретро автомобиллар коллекциячиси ноёб спорткарнинг янги эгаси бўлди. Тадбир Штутгартдаги “Mercedes-Benz” музейида бўлиб ўтди, у ўша куни кенг жамоатчилик учун ёпиқ бўлган.

Ўшанда Германия автогиганти компанияси иккита “300 SLR” моделини ишлаб чиқарган. Бироқ уларнинг ҳеч бири пойгаларда қатнашмаган. Шу билан бирга, автомобиллар умумий фойдаланишдаги йўлларда ҳаракатланиш учун рухсатномага эга эди.

Машиналардан бири бренднинг синов бўлими бошлиғи Рудольф Уленхаутга хизмат машинаси сифатида топширилган. Айнан унинг шарафига спорткарга “Uhlenhaut Coupe” лақаби берилди.
 

• Mercedes-Benz