Чарлз Стерт университети олимлари саратон бўйича тадқиқот ўтказишди ва унинг натижалари JAMA Network Open журналида чоп қилинди.

Олимлар саратон билан касалланганлар сони 76,6 фоизга – 2022 йилдаги 20 миллиондан 2050 йилда 35,3 миллионгача ошишини тахмин қилишмоқда.

Олимлар соғлиқни сақлаш, таълим ва аҳоли даромадларининг ўртача даражасини акс эттирувчи Инсон тараққиёти индексининг турли даражаларига эга бўлган мамлакатлар ўртасида саратон касаллиги динамикасида сезиларли фарқларни аниқлашди. Шундай қилиб, инсон тараққиёти индекси паст бўлган мамлакатларда саратон касаллигининг янги ҳолатлари деярли уч баравар кўпайиб, 142,1 фоизга, ўлим эса 146,1 фоизга ошиши мумкин. Инсон тараққиёти индекси жуда юқори бўлган мамлакатларда касалланиш ва ўлим даражасининг нисбатан камроқ ўсиши кутилмоқда - мос равишда 41,7 фоиз ва 56,8 фоиз.

Тадқиқот шунингдек, жинслар бўйича фарқларни аниқлади: 2050 йилга келиб эркакларда саратон касаллиги сонининг ўсиши 84,3 фоизни, ўлим эса 93,2 фоизни ташкил қилиши кутилмоқда, бу аёлларникига қараганда юқори. Ушбу номутаносибликка таъсир этувчи омиллар қаторига эркаклар орасида хавф омилларининг (масалан, алкоголь ва тамакига қарамлик) юқори даражада тарқалиши, шунингдек, айрим ҳудудларда скрининг ва даволаш хизматларининг сифатсизлиги киради.

• Olimlar
• Saraton
• илм-фан
• саломатлик
• тадқиқот