Жорий йилнинг 25 сентябрь куни Озарбайжон-Туркия ҳужжатларини имзолаш маросимидан сўнг Озарбайжон Республикаси Президенти Илҳом Алиев ва Туркия Республикаси Президенти Ражап Тоййиб Эрдўған матбуотга баёнот берди.

Президент Илҳом Алиев Нахчиванга ташрифи давомида имзоланган ҳужжатлар Туркия-Озарбайжон муносабатларининг ривожланишига хизмат қилишини қайд этди.

“Арманистон Озарбайжонга қарши босқинчилик сиёсатини юрита бошлаганида, Нахчиванга нисбатан ҳудудий даъволари ҳам бор эди. Бу ерда ҳам шиддатли жанглар бўлган. Ва айнан ўша пайтда Озарбайжоннинг буюк ўғли, ўша пайтда мухтор республика раҳбари бўлган Ҳайдар Алиев бошчилигида Нахчиван душманни ўз ўрнига қўйди ва Озарбайжон ўз ҳудудини ҳимоя қила олди”, - деди президент.

Президент Алиевнинг таъкидлашича, беш кун аввал Озарбайжон ўз суверенитетини тўлиқ таъминлаган.

“Агар биз уч йил аввал Иккинчи Қорабоғ уруши натижасида босқинчиликка чек қўйган бўлсак ва шу йилнинг 23 апрелида Озарбайжон-Арманистон чегарасининг Лачин йўналишида назорат-ўтказиш пункти ўрнатиш орқали ҳудудий яхлитлигимизни тўлиқ тиклаган бўлсак, унда беш кун олдин биз ўз суверенитетимизни тўлиқ таъминладик ва тикладик. Қорабоғ ҳудудида яшовчи одамлар миллатидан қатъи назар, Озарбайжон фуқароларидир”, - дея қўшимча қилди у.

Давлат раҳбарининг сўзларига кўра, бу одамларнинг хавфсизлиги ва ҳуқуқлари Озарбайжон давлати томонидан таъминланади.

Алиевнинг айтишича, бир неча кун аввал Евлах шаҳрида Қорабоғ арманлари вакилларининг Озарбайжон давлат идоралари вакиллари билан учрашуви бўлиб ўтган.

Озарбайжон президенти Қорабоғда яшовчи арман аҳолисининг озарбайжон жамиятига интеграциялашуви жараёни муваффақиятли давом этишига ишонч билдирди.

Президент Алиев, Туркиянинг Озарбайжоннинг Қорабоғ иқтисодий минтақасида ўтказаётган маҳаллий аксилтеррор операцияси давомида кўрсатган улкан ёрдамини таъкидлади:

“Ушбу воқеалар (терроризмга қарши чора-тадбирлар) содир бўлганида сиз (Эрдўған) АҚШда, Нью-Йоркда, БМТ Бош Ассамблеяси йиғилишида қатнашган эдингиз. У ерда дунёнинг энг юксак минбаридан туриб Озарбайжон давлати манфаатларини ифодаловчи баёнотлар бердингиз. Сиз тўлиқ халқаро ҳуқуққа асосланган адолатли баёнотлар қилдингиз – “Қорабоғ Озарбайжон заминидир! Бу ҳам тўғри, айни пайтда халқаро ҳуқуққа тўлиқ мос келади ва бу Туркиянинг яна бир қардошлик қадамидир”,– деди у.

• Эрдоған
• Илҳом Алиев
• Озарбайжон