АҚШ Конгресси Вакиллар палатаси спикери Ненси Пелосининг 2022 йил 18 сентябрь куни Арманистонга ташрифи чоғидаги баёнотига Озарбайжон Республикаси Ташқи ишлар вазирлиги ўз муносабатини билдирди.

"Н.Пелосининг Озарбайжонга нисбатан асоссиз ва адолаcиз айбловлари қабул қилиниши мумкин эмас”, дейилади Озарбайжон Республикаси Ташқи ишлар вазирлиги баёнотида.

Муносабатда айтилишича, жорий йилнинг 12 сентябрдан 13 сентябрга ўтар кечаси делимитацияланган шартли чегарада содир бўлган воқеа Арманистон томонидан Озарбайжонга қарши кенг кўламли ҳарбий провокация бўлиб, Озарбайжон Қуролли кучлари томонидан бу провокациянинг олди олинган ва мамлакат суверенитети ва ҳудудий яхлитлиги таъминланган.

“Ҳозирги вақтда ўт очишни тўхтатиш режими таъминланиб, вазият барқарорлаштирилган. Минтақадаги вазиятнинг кескинлашуви ва кенг кўламли провокация учун барча масъулият Арманистон ҳарбий-сиёсий раҳбариятига юкланади.

Умуман олганда, Н. Пелоси арманпараст сиёсатчи сифатида танилган ва унинг делегацияси таркибида арманпараст Конгресс аъзоларининг борлиги ҳам буни бевосита кўрсатиб турибди. “АҚШда Конгрессга оралиқ сайловлар даври келаётганини инобатга олсак, Н.Пелоси бу ташрифдан АҚШдаги арман лобби доираларининг қўллаб-қувватлаши ва ўзининг ички сиёсий дастуридан фойдаланиш учун фойдаланаётганга ўхшайди", – дейилади Озарбайжон Республикаси Ташқи ишлар вазирлиги баёнотида.

АҚШнинг ички сиёсий кун тартибидаги сиёсий интригалар ва лоббичилик манфаатларини Арманистон орқали Жанубий Кавказ минтақасига ўтказиш қабул қилиниши мумкин эмаслиги таъкидланди.

“Афсуски, адолат ҳақида гапираётган Н.Пелосининг Арманистоннинг Озарбайжонга қарши босқинчилик сиёсати, унинг ҳудудининг қарийб 30 йил давомида босиб олиниши, юз минглаб озарбайжонларга нисбатан этник тозалаш ва бошқа шу каби оғир жиноятлар юзасидан мақсадли равишда ҳеч қандай позиция кўрсатмаганини алоҳида таъкидлаймиз. Бунинг учун Арманистон жавобгар" – дейди Ташқи ишлар вазирлиги.

Таъкидланишича, Н.Пелосининг Арманистонда айтганлари арман пропагандаси асосида қилинган баёнот сифатида баҳоланиши керак. Бу Арманистон ва Озарбайжон ўртасидаги муносабатларни нормаллаштиришга қаратилган саъй-ҳаракатларга жиддий зарба бўлган.

"Бундай бирёқлама қадамлар, асоссиз баёнотлар минтақадаги мўрт тинчликни мустаҳкамлашга эмас, аксинча кескинликни кучайтиришга хизмат қилмоқда", дейилади ТИВ муносабатида.

• Озарбайжон
• Pelosi