Ўзбекистон ва Италия “The Samarkand express” сайёҳлик поездини йўлга қўяди. Бу ҳақда Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Туризм қўмитаси хабар берди.

Ушбу туристик поезд лойиҳаси бўйича Тошкент халқаро инвестиция форуми доирасида “Ўзбекистон темир йўллари” АЖ ва Италиянинг “Arsenale Group” компанияси ўртасида ҳужжат имзоланган.

“Бой тарихий мерос ва табиий гўзалликка эга бўлган Ўзбекистон ўтган йили Самарқандда бўлиб ўтган БМТ жаҳон туризм ташкилоти бош Ассамблеясининг 25-юбилей сессияси доирасида “The Samarkand express” сайёҳлик поезди ишга туширилиши туфайли туризм салоҳиятини ривожлантиришда муҳим қадам ташлади”, дейилади хабарда.

Маълум бўлишича, поезд нафақат транспорт воситаси, балки йўловчиларга қадимий ва замонавий Ўзбекистон тарихи, анъаналари ва турмуш тарзи билан танишиш имкониятини берувчи маданий алмашинув платформаси бўлади.

“The Samarkand express”– йўловчиларга мислсиз қулайликлар ва унутилмас саёҳат тажрибасини тақдим этадиган ҳашаматли поезддир. Йўловчилар кенг ва нафис купелар, сархил таомлар, юқори даражали хизмат кўрсатиш ва гўзал Ўзбекистон ландшафтларининг ҳайратланарли манзараларини тақдим этувчи панорамали ойналардан фойдаланишлари мумкин бўлади.

• Италия
• Поезд
• Сайёҳ