Жорий йилнинг 24 февраль куни Ўзбекистон Республикаси иқтисодиёт ва молия вазирининг ўринбосари Илхомжон Умрзаков Полша тараққиёт ва технологиялар вазирининг ўринбосари Михал Ярос бошчилигидаги делегация вакиллари билан учрашув ўтказди.

Полша делегацияси таркибига давлат активлари вазирининг ўринбосари, дори воситалари бошқармаси раисининг ўринбосари, бизнес Омбудсмани, инвестициялар ва савдо агентлиги президенти, шунингдек Полша ихтисослаштирилган идоралари ва ишбилармон доираларининг етакчи мутахассислари кирди.

Музокаралар икки мамлакат ўртасидаги иқтисодий ва савдо алоқаларини мустаҳкамлаш ва кенгайтиришга бағишланди.

Томонлар ўзаро манфаатли иқтисодий ҳамкорликнинг кенг йўналишларини, жумладан хусусийлаштириш, банк сектори, фармацевтика саноати, геология ва бошқа соҳаларни муҳокама қилдилар. Полша томони мазкур йўналишларда Ўзбекистон билан тажриба алмашишга тайёрлигини билдирди.

Бундан ташқари, Ўзбекистон томони Полшанинг ҳудудларни ривожлантириш, шунингдек, энергия самарадорлигини ошириш борасидаги тажрибасини ўрганишга қизиқиш билдирди. Учрашув якунида Полша томони Ўзбекистон иқтисодиётининг турли тармоқларига инвестицияларни жалб этиш, қўшма корхоналар ташкил этиш ва илғор технологияларни жорий этишдан фаол манфаатдор эканини билдирди. Бу, ўз навбатида, янги иш ўринларини яратишга ва икки мамлакат иқтисодиётининг рақобатбардошлигини оширишга ёрдам беради.

Ушбу учрашув икки томонлама муносабатларни мустаҳкамлашда муҳим қадам бўлди ва ҳар икки мамлакат аҳолисининг барқарор иқтисодий ўсиши ва турмуш даражасини оширишга ёрдам берадиган чуқур ҳамкорлик учун янги имкониятлар очди.

• Ҳамкорлик
• Ўзбекистон
• Полша