Маълумотларга кўра, Ўзбекистонда Аи-80 бензинидан босқичма-босқич воз кечиш режалаштирилмоқда. Бу ҳақда Энергетика вазирлиги матбуот хизмати “Хabar.uz”га маълум қилган.

Қайд этилишича, Аи-80 бензини кўп мамлакатларда тақиқланган бўлиб, ҳатто нефть маҳсулотларини тўлиқ импорт қиладиган Қирғизистон ва Тожикистонда ҳам аллақачон истеъмолдан олинган. Ҳозирча минтақада фақат Ўзбекистон ва Афғонистонда Аи-80 бензинидан фойдаланиш давом этмоқда.

Вазирликнинг билдиришича, 2025 йилга бориб Фарғона нефтни қайта ишлаш заводида Аи-80 ишлаб чиқарилиши тўхтатилса, 2026 йилга бориб Бухоро нефтни қайта ишлаш заводи тўлиғича сифатлироқ ёқилғи ишлаб чиқаришга ўтказилади.

Аҳолида Аи-80 бензини нархи кўтарилгани ҳақида саволлар кўпаймоқда. Вазирлик томонидан таъкидланишича, бензин нархи ошмаган, балки унга нисбатан қўлланилган имтиёз муддати якунига етгани туфайли акциз солиғи жорий этилган.

Яъни, шунчаки бугунга қадар бўлган 6080 сўм нарх устига акциз солиғи қиймати ҳам қўшилгани туфайли бир литр Аи-80 русумли бензин “UNG Petro” заправкаларида 6800 сўмдан сотила бошланган.

Шунингдек, ёқилғи бозорида тақчиллик кузатилмаслиги ва истеъмолда узилиш бўлмаслиги учун чора-тадбирлар режалаштирилган. Хориждан бензин олиб кирувчи субъектлар фаолиятини кенгайтириш орқали истеъмол бозорини бир маромда ушлаб турилади. Татнефт, Saneg ва Лукойл каби хорижий сармоядорларга кўпроқ заправкалар қуриш имкони берилади.

• Бензин
• Энергетика_вазирлиги