Эндиликда болаларни турли зўравонликлардан ҳимоя қилиш мақсадида уларга ҳимоя ордери берилади. Бу ҳақда парламентнинг қуйи палатаси маълум қилди.

Ушбу амалиёт Вазирлар Маҳкамаси томонидан Олий Мажлис Қонунчилик палатасига киритилган “Болаларни зўравонликларнинг барча шаклларидан ҳимоя қилиш тўғрисида”ги қонун лойиҳасида кўрсатиб ўтилган. Унда болаларни зўравонликдан ҳимоя қилиш соҳасидаги давлат сиёсатининг асосий йўналишлари, болаларни зўравонликдан асрашга масъул давлат органлари ва ташкилотлар, шунингдек, уларнинг ваколатлари белгиланган.

Бундан ташқари, лойиҳада болаларни зўравонликдан ҳимоя қилишда ота-оналарнинг ёки уларнинг ўрнини босувчи шахсларнинг иштироки, уларнинг мажбуриятлари, таълим ташкилотларида болаларга нисбатан зўравонликка йўл қўйилмаслик қайд этилган.

Билдирилишича, мазкур лойиҳани ишлаб чиқишда Германия, Франция, Дания, Цингапур, Венгрия, Болгария, Албания, Грузия каби давлатларнинг тажрибаси ўрганилган.

Ҳозирда қонун лойиҳаси Қонунчилик палатасининг Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси томонидан дастлабки тарзда кўриб чиқилмоқда.

• Болалар
• Олий Мажлис
• Қонун