Ўзбекистон бўйлаб 843 нафар одамни алдаб, уларнинг 50,1 млрд сўм пулини ўзлаштирган гуруҳ қўлга олинди. Улар автомобилларни арзон кредит ёки лизингда етказиб беришни ваъда қилган. ИИВ гуруҳдан жабрланганларни 102 қисқа рақамига мурожаат қилишларини сўради.

Ўзбекистон Ички ишлар вазирлиги автомобилларни арзон кредит ёки лизингда етказиб бериш баҳонасида юзлаб фуқароларни алдаб, йирик фирибгарлик жиноятини амалга оширган гуруҳ қўлга олинганини маълум қилди.

ИИВ маълумотларига кўра, “Umid avto companies”, “Umid Savdo Fayz Invest”, “Umid Avto Lizing”, “Umid Auto”, “Group Of Companies Ual”, “Umid Avto-Tashkent”, “Orient Auto”, “Umid Lizing Tashkent”, “Orient Avto-Lizing”, “Umid Auto Leasing”, “Group Of Orient Auto”, “Imkon Auto Xizmati”, “Umid Avto Companies”, “Busines Orientauto”, “Umid Auto Xizmati”, “Orient Auto Hamkor”, “Imkon Avto Markaz”, “Avtovariant”, “Ava Orientauto”, “AvaUmidavto”,  “Avto Ijara Hizmati”, “Umid Auto Business Toshkent”, “Orient Auto Leasing”, “Orient Auto Toshkent”, “Ilgor Lizing” ва “Orient Finans Lizing” МЧЖлар ташкил этилган.

Ушбу компаниялар ижтимоий тармоқлардаги реклама орқали одамларни 6−12 фоизли паст тўлов шароитида машиналар олиб беришга ишонтирган ва Тошкент, Андижон, Наманган, Фарғона, Сирдарё, Самарқанд, Бухоро, Навоий, Хоразм, Сурхондарё, Қашқадарё вилоятлари ҳамда Нукус шаҳрида фаолият юритиб, аванс шартномалари тузган ҳолда пулларни ўзлаштирган.

Вазирликка кўра, ушбу гуруҳнинг жиноий фаолияти оқибатида 843 нафар фуқаро жабрланган, уларнинг умумий зарари 50,1 миллиард сўмни ташкил этган. Тергов доирасида ушбу компанияларга тегишли 339 та транспорт воситаларига хатлов қўйилган.

ИИВ қўшимча қилиб, мазкур иш бўйича 9 нафар шахсга расмий айблов эълон қилиниб, уларга нисбатан “қамоқ” эҳтиёт чораси қўлланганини маълум қилди.

Ички ишлар вазири ўринбосари полковник Рамазон Ашропов раҳбарлигида махсус тезкор штаб тузилган. У штабда тегишли мутахассислар жалб этилган ҳолда ИИВ Транспорт ва туризм объектларида хавфсизликни таъминлаш департаменти биносида ҳар куни соат 09:00 дан 21:00 га қадар жабрланувчилар мурожаатлари қабул қилинмоқда.

ИИВ суратдаги шахслар ёки уларга алоқадор компаниялар фаолияти ҳақида маълумоти бор ёки ўзи шу йўл билан жабрланган фуқаролардан тезкор штабга ёки 102 қисқа рақамига мурожаат қилишларини сўрамоқда.

• Фирибгарлик
• ИИВ
• Ogohlantirish