АҚШ президенти Доналд Трамп, май ойи ўрталарида Суриянинг янги етакчиси Аҳмад аш-Шараа билан учрашуви олдидан берган ваъдасига мувофиқ, Қўшма Штатларнинг Сурияга нисбатан санкцияларини бекор қилиш тўғрисидаги фармонни имзолади.

Оқ уйнинг маълум қилишича, бу қарор “барқарорлик ва тинчлик сари йўлдаги муҳим қадам” ҳисобланади.

Шу билан бирга, Россияга қочиб кетган Суриянинг собиқ президенти Башар Асад, унинг оиласи аъзолари ва ағдарилган режим тарафдорларига нисбатан санкциялар эса ўз кучида қолмоқда.

Оқ уй баёнотига кўра, АҚШ янги Сурия ҳукумати ҳаракатларини, жумладан, “Исроил билан муносабатларни нормаллаштиришга қаратилган аниқ чораларни” кузатиб боради.

Муваққат Сурия ҳукуматининг ташқи ишлар вазири Асад ал-Шибоний санкцияларнинг бекор қилиниши Сурия иқтисодиётини тиклаш йўлидаги тўсиқларни бартараф этишини ва мамлакатни халқаро ҳамжамият учун очишини билдирган.

АҚШ Молия вазири Скотт Бессент баёнотида фармон Сурия халқига “Башар Асаднинг золим режими ағдарилгач, ҳаётни янгидан бошлаш имконини беради”, – дейилади.

“Бугунги қарорлар Сурия иқтисодиётини глобал савдога қайта боғлаш ва мамлакат инфратузилмасини тиклаш имконини яратади”, – деган у.

• АҚШ
• Санкция
• Suriya
• Трамп