Республика ва 14 та ҳудудий сув таъминоти корхоналарида ягона ситуатсион марказ ташкил этиш орқали аварияларни тезкор бартараф қилиш тизими жорий этилади. Бу ҳақда 28 февраль куни президент Шавкат Мирзиёев томонидан имзоланган қарорда белгиланди.

“Осиё тараққиёт банки иштирокида “Иқлим технологиялари орқали сув ресурсларини бошқаришни ривожлантириш” лойиҳасини амалга ошириш чора-тадбирлари тўғрисида”ги қарорга кўра, йирик сув иншоотлари ва магистраль қувурларга 4,8 мингта ҳисоблагичларни ҳамда 2,8 мингта телеметрия тизимларини ўрнатиш ҳисобига ишлаб чиқарилган ичимлик сувининг аниқ ҳисоби юритилади. 12,7 мингта сув иншоотлари ҳамда 80 минг километр ичимлик ва оқова сув тармоқларининг рақамли харитасини (ГИС) жорий этиш орқали инфратузилмани янгилаш ишлари самарадорлигини оширилади.

Шунингдек, 5,1 миллион истеъмолчини қамраб олган биллинг тизимини такомиллаштириш, сув таъминоти корхоналари молиявий ҳисоботининг халқаро стандартларига ўтиш ва консолидациялашган ҳисоб-китобини юритиш ҳам кўзда тутилган.

Ўзбекистондаги барча ичимлик суви таъминоти корхоналарида сифат мониторингини юритиш ва маълумотларни бошқариш марказларини яратиш режалаштирилган. 2025 йил январь ойи ҳолатига кўра, Ўзбекистон аҳолисининг 80,9 фоизи марказлашган ичимлик суви билан таъминланган. Сўнгги 6 йилда аҳолининг ичимлик суви таъминотини яхшилашга 10 триллион сўмга яқин маблағ йўналтирилди. Ушбу маблағлар ҳисобидан 1 176 та сув иншооти ва 20,8 минг километр ичимлик суви тармоқлари тортилди.

Ўзбекистонда 2026 йилда марказлашган ичимлик суви билан таъминланганлик 90 фоизга, оқова сув хизмати билан қамраб олинганлик даражаси 35 фоизга етказилади.

• Президент
• Қарор
• Шавкат Мирзиёев
• Suv ta’minoti
• korxona