“Ҳудудгаз Жиззах” газ таъминоти филиали етакчи мутахассиси Жиззах шаҳрида фаолият юритувчи МЧЖда ўтказилган текширувда носоз газ ҳисоблаш ускунасидан фойдаланилганлигини аниқлаб, бу бўйича тегишли далолатнома тузади.

У ўз хизмат мавқеини суиистеъмол қилиб, тузилган далолатномани бекор қилиш ҳамда Иқтисодий жиноятларга қарши курашиш департаментининг Жиззах шаҳар бўлими томонидан олиб борилаётган терговга қадар текширув бўйича жиноят иши қўзғатмаслик масаласини ҳал қилиб бериш эвазига МЧЖ вакилидан 6 минг АҚШ доллари талаб қилади.

Давлат хавфсизлик хизмати ходимлари томонидан ўтказилган тезкор тадбирда, у сўралган пул маблағини “Ҳудудгаз Жиззах” газ таъминоти филиали биноси олдида олган вақтида ашёвий далиллар билан ушланган. Бу ҳақида ДХХ матбуот хизмати хабар берди.

Таъкидлаш лозимки, ўтказилган лаборатория текшируви натижасига кўра, газ ҳисоблагич ташқи таъсир кўрсатилмаган ҳолда носоз ҳолатга келган.

Ҳозирда мазкур шахсга нисбатан Жиноят Кодексининг 25,168-моддаси 3-қисми “в” банди ва 28,211-моддаси 1-қисми билан жиноят иши қўзғатилган.

Дастлабки тергов ҳаракатлари доирасида етакчи мутахассисни ИЖҚКД Жиззах шаҳар бўлимидаги “таниши”нинг шахсига аниқлик киритилиб, ҳозирда унга нисбатан хизмат текшируви тайинланган.

• Ҳудудгазтаъминот
• Жиззах
• Пора