Бугун, 5 июнь куни Буюк Британиянинг нуфузли “QS Quacquarelli Symonds” халқаро рейтинг агентлиги дунёдаги энг яхши университетлар 2025-рейтинги натижаларини эълон қилди.

Рўйхатда биринчи марта Ўзбекистоннинг бирваракайига икки олий таълим муассасаси – Тошкент ирригация ва қишлоқ хўжалигини механизациялаш муҳандислари институти Миллий тадқиқот университети 547-ўринда ҳамда Мирзо Улуғбек номидаги Ўзбекистон миллий университети 781–790-ўрин билан муносиб жой эгаллади.

Ушбу университетлар халқаро рейтинг агентлиги методологиясининг тўққиз кўрсаткичидан олтитасида юқори кўрсаткичларни намоён этган. Академик нуфуз кўрсаткичи бўйича дунёнинг энг яхши 300 та олий ўқув юртлари қаторига ва Марказий Осиёдаги энг яхши университетлар учлигига киритилган.

Хусусан, рейтингнинг “Ўқитувчи–талаба нисбати” кўрсаткичи (144-ўрин) бўйича дунёнинг 200 та энг яхши университетлари қаторидан жой олди.

Маълумот учун, “QS Quacquarelli Symonds” глобал олий таълим сектори учун хизматлар, тадқиқот ва таҳлиллар тақдим этувчи дунёдаги етакчи рейтинг агентлиги бўлиб, университетлар самарадорлигини қиёсий таққослаш орқали маълумотлар тақдим этувчи дунёдаги энг машҳур манба ҳисобланади.

• ОТМ