Ўзбекистоннинг олтин-валюта захиралари тарихий рекордни янгилади. Ўзбекистон Марказий банки маълумотларига кўра, 2026 йил 1 март ҳолатига захиралардаги халқаро активларнинг умумий ҳажми 77,08 миллиард долларни ташкил этди.

Маълумотларга кўра, захиралар бир ой давомида қарийб 2 миллиард долларга ошган. Йил бошидан буён эса уларнинг ҳажми 16,2 фоиздан кўпроққа кўпайган.

Ўсиш асосан олтин нархининг кўтарилиши ҳамда захиралардаги қимматбаҳо металл ҳажмининг ортиши билан изоҳланмоқда. Ҳисобот ойида олтин нархининг 5063,45 доллардан 5174,10 долларгача ошиши захиралар қийматига қарийб 1,4 миллиард доллар қўшган.

Натижада олтиннинг умумий қиймати кетма-кет саккизинчи ой рекорд даражага етиб, 67,67 миллиард долларни ташкил этди. Бу кўрсаткич ўтган ойга нисбатан 2,69 миллиард долларга кўп. Олтиннинг физик ҳажми ҳам 12,8 миллион трой унциядан 13,1 миллион трой унциягача ошган.

Шу билан бирга, валюта захиралари қисқариб, 8,83 миллиард долларни ташкил этди. Хорижий марказий банклар ҳамда Халқаро валюта жамғармаси ҳисобларидаги валюта захиралари 1,2 миллиард доллар, хорижий банклардаги маблағлар эса 6,09 миллиард доллар бўлган.

Бундан ташқари, хорижий қимматли қоғозлар қиймати бироз ошиб, 1,54 миллиард долларга етди. Аввалги ойда бу кўрсаткич 1,536 миллиард долларни ташкил этган.

• Олтин
• Ўзбекистон