Узоқ давом этган музокаралардан сўнг Киев ва Вашингтон Украинани тиклаш учун инвестиция фондини ташкил этиш тўғрисида қарор қабул қилди. Ушбу ҳужжатга АҚШ Молия вазири Скотт Бессент ва Украина Иқтисодиёт вазири Юлия Свириденко имзо чекди.

“Бугун Қўшма Штатлар ва Украина ўртасида иқтисодий шериклик тўғрисидаги тарихий битим имзоланганини эълон қилишдан мамнунман. Бу битим Украина иқтисодиётини тезроқ тиклашга кўмаклашиш учун “АҚШ–Украина” инвестиция фондини ташкил этади. Иқтисодий хавфсизлик – бу миллий хавфсизлик”, — дея маълум қилди Бессент ҳужжат имзоланганидан сўнг. 

Мазкур битим ҳақида матбуот релизи АҚШ Молия вазирлигининг веб-сайтида эълон қилинди. Аммо ҳужжат матни ҳали эълон қилинмади.

Украина Иқтисодиёт вазири ўзининг Facebook саҳифасида битимнинг асосий шартларини баён қилди. Унга кўра, фонд “50/50” тамойили асосида, яъни Киев ва Вашингтон томонидан тенг улушда бошқарилади.

“Мазкур битимнинг амалга оширилиши ҳар икки давлатга иқтисодий салоҳиятини ошириш имконини беради. Бу тенг шериклик ва сармоялар ҳисобига юзага келади”, — дея қайд этди Юлия Свириденко.

Унинг сўзларига кўра, имзоланган битим Украинанинг АҚШ олдида қандайдир қарздорлик мажбуриятларини назарда тутмайди.

“Бизнинг ҳудудимиз ва ҳудудий сувларимиздаги барча ресурслар Украинага тегишли. Қаерда ва нимани қазиб олишни Украина давлатининг ўзи белгилайди. Ер ости бойликлари украин халқига тегишли бўлиб қолади”, — дея аниқлик киритди у.

Свириденконинг қўшимча қилишича, Украина-АҚШ фонди фаолиятининг дастлабки 10 йили давомида даромадлар фақат янги лойиҳаларга ёки мамлакатни қайта тиклашга йўналтирилади.

• АҚШ
• Битим
• Украина