Германия канцлери вазифасини бажарувчи Олаф Шолц ушбу лавозимда жамоатчилик олдида сўнгги нутқини сўзлади. Сиёсатчи Гамбургдаги Ноенгамме концлагери озод этилганининг 80 йиллиги муносабати билан ўтказилган маросим меҳмонларига мурожаат қилди.

“Немислар бошлаган урушдан, нацистларнинг террор режимидан, миллионлаб бегуноҳ аёллар, болалар ва эркакларнинг ўлдирилишидан олинган энг муҳим сабоқлардан бири шундаки, бизнинг қитъамиз, халқларимиз ўртасидаги урушларни ўтмишда қолдиришимиз кераклигига бўлган чуқур ишончимиздир”, – дея фикр билдирди Шолц.

Унинг сўзларига кўра, Владимир Путин “яна Европага уруш олиб келгани” янада ачинарли. “Биз бундай ҳолатни қабул қилмаслигимиз керак”, — дея таъкидлаган сиёсатчи.

Шолц Европани “эркинлик, демократия ва ҳуқуқий жамиятнинг жонли ва нафас олаётган тимсоли” деб атаб, бу тамойиллар “ҳарбий империализм ҳамда халқаро ҳуқуқни менсимаслик билан мос келмаслигига” урғу берган.

• Германия
• Olaf Shols