Туркия президенти Ражаб Тоййиб Эрдўған Швеция Туркиядан унинг НАТОга киришини маъқуллашини кутмаслиги кераклигини маълум қилди. Эрдўған бу ҳақда даниялик ўнг қанот сиёсатчи ҳафта охирида Туркиянинг Стокголмдаги элчихонаси олдида норозилик намойиши ўтказиб, Қуръонни ёқиб юборганидан кейин маълум қилди.

“Швеция биздан НАТОга аъзо бўлишни қўллаб-қувватлашимизни кутмаслиги керак. Мамлакатимиз элчихонаси олдида бундай шармандаликни содир этганлар ўз аризалари борасида энди бизнинг фойдамизга умид қила олмаслиги аниқ”, – деди Эрдоған.

Россиянинг Украинага ҳужумидан сўнг, Швеция ва Финляндия НАТОга аъзо бўлиш учун ариза берган, аммо Туркия иттифоқ аъзоси сифатида уларнинг қабул қилинишига тўсқинлик қилиши мумкин ва ҳали тегишли ҳужжатларни ратификация қилмаган.

Анқара Стокголмдан мамлакатда террорчи, деб топилган 70 дан ортиқ одамни, асосан турк курдларини топширишни талаб қилмоқда.

Аввалроқ Туркия Швеция мудофаа вазири Пол Жунсоннинг келаси ҳафтага мўлжалланган Анқарага ташрифини бекор қилганди. Туркия Мудофаа вазири Ҳулуси Акар, ташриф ўз маъносини йўқотганини маълум қилган.

Ушбу акцияни 21 январь, шанба куни сўнгги сайловларда 1,8 фоиз овоз олган Даниянинг исломга қарши партия етакчиси Расмус Палудан уюштирган. Швеция полицияси элчихонада акция ўтказишга рухсат берди, аммо Қуръонни ёқишга рухсат бермади ва Палудан уни кейинроқ, элчихона яқинида ёқиб юборган.

Швеция ҳукумати ҳам бу ишорани қоралаган.

“Швецияда кенг сўз эркинлиги мавжуд, аммо бу Швеция ҳукумати ёки шахсан мен бундай фикрларни қўллаб-қувватлаймиз, дегани эмас”, – деди ташқи ишлар вазири Тобиас Билстрем.

• НАТО
• Россия
• Швеция
• Туркия
• Украина