Олимлар 14 июль куни бешта кучли қуёш чақнашларини қайд этди, улардан бири энг юқори Х синф бўлди, деб хабар берди “ТАСС” ахборот агентлиги.

“14 июль куни Москва вақти билан соат 05:34 да рентген диапазони 3738 (S12W39) гуруҳида 29 дақиқа давом этган Х1.3 чақнаши қайд этилди”, — дейилади Амалий геофизика институти хабарида.

Шунингдек, якшанбага ўтар кечаси М5.0, М2.7, М1.7, ва эрталаб эса М3.0 чақнаш содир бўлган.

Чақнашдан кейин қуёш рентген нурларининг Ер ионосферасига таъсир қилиш даражаси космик об-ҳаво маълумотларининг беш балли шкаласида R3 (кучли) даражасида бўлди, бу ерда энг юқори - R5 (экстремал). Ҳозирги вақтда космик об-ҳаво мониторинги маълумотларига кўра, R шкаласидаги даража хотиржамликни билдиради.

Рентген нурланишининг кучига қараб қуёш чақнашлари бешта синфга бўлинади: A, B, C, M ва Х. Энг паст - А0.0 синфи Ер орбитанинг 1 квадрат метрига 10 нВт радиация қувватига тўғри келади. Кейинги ҳарфга ўтганда, қувват 10 баробар ортади. Чақнаш одатда қуёш плазмаси эмиссияси билан бирга келади. Уларнинг булутлари Ерга етиб бориши ва магнит бўронларини келтириб чиқариши мумкин.

• Chaqnash
• Quyosh