Кеча, 23 март оқшомида ФИФА кунлари доирасида бир қатор терма жамоалар ўз ўйинларини ўтказишди.
Хусусан, Европа чемпионати-2024 саралашининг 1-босқичи доирасида Португалия Лихтенштейн терма жамоасини қабул қилиб, йирик 4:0 ҳисобида зафар қучди.
Ушбу ўйинда Роналду дубль қайд этиб, терма жамоанинг расмий учрашувида 100 та гол урган тарихдаги биринчи футболчига айланди.
Шу билан бирга, Лихтенштейн билан баҳс Роналдунинг халқаро миқёсдаги фаолиятида 197-ўйин бўлди. Ушбу кўрсаткич бўйича ҳам у жаҳон рекордчисига айланди.
Роналду терма жамоадаги ўйинлари сони бўйича Қувайт терма жамоасида 196 та ўйинда майдонга тушган Бадер Ал-Мутава ва 195 та баҳс ўтказган Малайзия терма жамоаси аъзоси Со Чин Эннани ортда қолдирди.
Шунингдек, кеча Англия терма жамоаси Евро-2024 саралаши доирасида Италияни 2:1 ҳисобида мағлубиятга учратди.
Инглизлар сардори Ҳарри Кейн жамоасининг иккинчи голига муаллифлик қилди. Бу тўп ҳужумчининг Англия терма жамоаси сафидаги 54-голи бўлди ва бу уни миллий терма жамоа тарихидаги энг яхши тўпурарга айлантирди.
Кейн 53 та гол билан тўпурарлар рўйхатида «Манчестер Юнайтед» ва «Эвертон»нинг афсонавий ҳужумчиси Уэйн Рунидан ўзиб кетди.
Бундан ташқари, Аргентина терма жамоаси Панамага қарши ўртоқлик ўйинида майдонга тушиб, 2:0 ҳисобида ғалаба қозонди. Мазкур беллашувда Лионел Месси профессионал фаолиятидаги 800-голини урди.
Қайд этиш мумкин, бунгача аргентиналик юлдуз клублар миқёсида 701, терма жамоа сафида эса 99 марта гол уришга муваффақ бўлган.
Маълумот ўрнида, 2005 йилдан буён Аргентина терма жамоаси сафида тўп тепаётган Месси терма жамоанинг энг яхши тўпурари ҳисобланади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!