“Netflix” “Севги, ўлим ва роботлар” антологиясининг учинчи қисми трейлерини намойиш этди.

Қайд этилишича, видеода тўққиз қисмнинг ҳар бири учун визуал услуб, сарлавҳалар ва сюжет ёки вазиятнинг қисқача тавсифи очиб берилган.

Биринчи икки фаслда бўлгани каби, сериялар бир-бирига боғлиқ эмас ва мустақил асарлар – биринчи қисмдаги қаҳрамонларнинг янги саргузаштлари ҳақида ҳикоя қилувчи “Уч робот: Чиқиш стратегиялари” эпизоди бундан мустасно.

Таъкидланишича, янги мавсум премьераси бугун, 20 май куни “Netflix”да бўлиб ўтади.

“Севги, ўлим ва роботлар” бу “Netflix” стриминг хизмати томонидан буюртма қилинган ва катталар аудиториясига мўлжалланган Америка анимацион сериал-антологиядир. 18 қисмдан иборат биринчи мавсум 2019 йил 15 мартда илк бор премьера қилинган.

Сериалнинг ижрочи продюсери Девид Финчер, Тим Миллер, Жошуа Донен ва Женнифер Миллер ҳисобланади. Ҳар бир эпизод бутун дунё бўйлаб турли жамоалар ва студиялар томонидан яратилган. Серия 10 йилдан ортиқ ишлаб чиқилган. 

Сериал ғояси Финчер ва Миллер “Heavy Metal” журналидаги комикслар ва ҳикоялардан илҳомланганидан сўнг пайдо бўлган.

Аввалроқ, компания “Қора ойна” сериал-антологиясининг давоми устида ишлаётгани ҳақида хабар берган эдик.

Қайд этиш мумкин, шоу янада каттароқ ва узунроқ бўлади. Янги мавсумда аввалгидек уч эмас, балки кўпроқ эпизод бўлади ҳамда уларнинг ҳар бири алоҳида филмга ўхшайди.
Бироқ премьера санаси, сюжет тафсилотлари ва актёрлар таркиби ҳақида батафсил маълумот берилмаган.

• Netflix