Ўзбекистон Президенти Шавкат Мирзиёев АҚШга амалий ташрифи давомида анъанага кўра, ушбу мамлакатда меҳнат ва истиқомат қилаётган ўзбекистонликлар, шунингдек, АҚШнинг нуфузли университетларида таҳсил олаётган “Эл-юрт умиди” жамғармаси стипендиатлари билан учрашди. Бу ҳақда Президент матбуот хизмати хабар берди.

Самимий суҳбат давомида Янги Ўзбекистондаги ислоҳотларни амалга ошириш билан боғлиқ масалалар, хусусан, уларни фаол илгари суришда ўзбекистонликлар ва уларни бирлаштирувчи ташкилотларнинг иштироки муҳокама қилинган.

Учрашувда муваффақиятли тадбиркорлик фаолиятини йўлга қўйган фуқаро ва ёшлар ўртасида мулоқот майдонини яратишга қаратилган “Ватандошларнинг халқаро бизнес марафони”га старт берилган.

Иштирокчилар Ўзбекистон ва АҚШ ўртасидаги савдо-иқтисодий, инвестициявий, илмий ва таълим алоқаларини кенгайтириш ва мустаҳкамлаш, миллий иқтисодиётнинг устувор соҳаларига АҚШнинг илғор технологияларини жорий этиш, тиббиёт, транспорт ва логистика соҳаларида инновацияларни илгари суриш, мамлакатда маркетплейсларни ривожлантириш бўйича ўз таклифларини билдирган.

Давлат раҳбари йиғилганларга Ўзбекистон тараққиётига қўшаётган ҳиссаси учун миннатдорлик билдириб, айтилган барча таклиф ва ташаббуслар мамлакат вазирлик ва идоралари томонидан пухта ўрганиб чиқилиши, энг истиқболлилари эса амалиётга татбиқ этилишини таъкидлаган.

Ўзбекистон Президенти АҚШда “Эл-юрт умиди” стипендиатлари сони 500 нафардан ошганига алоҳида эътибор қаратган. Истеъдодли ёшларни қўллаб-қувватлаш, уларнинг билим ва тажрибасини мамлакатда қўллаш учун имконият яратиш давлат сиёсатининг асосий устувор йўналишларидан бири эканлиги таъкидлаган.

Президент Шавкат Мирзиёев талабаларга ўқишда ва келгусидаги касбий фаолиятларида муваффақиятлар тилаб, ёшларнинг ташаббусларига доимо очиқлиги ва уларни ҳар томонлама қўллаб-қувватлашга тайёр эканини таъкидлаган.

Ўз навбатида, учрашув иштирокчилари Ўзбекистон етакчисига хориждаги ватандошлар ва ёшларга кўрсатилаётган эътибор, уларнинг салоҳиятини рўёбга чиқариш учун яратилаётган шароит ва имкониятлар учун миннатдорлик билдириб, Ўзбекистон равнақига янада кўпроқ ҳисса қўшишга тайёрлигини билдирган.

• АҚШ
• Шавкат Мирзиёев
• Ташриф
• uchrashuv