Россия Мудофаа вазири Сергей Шойгу мамлакат Президенти Владимир Путинга Россия қўшинлари Донецк жануби-ғарбидаги Маринка шаҳрини тўлиқ назоратга олганини маълум қилди. Бу ҳақда Кремль сайтида эълон қилинган расмий баёнотда сўз боради.

Шойгунинг айтишича, шаҳарнинг қўлга олиниши Украина қуролли кучларининг имкониятларини пасайтиради ва Россия ҳарбийларига Донецкни янада самаралироқ “ҳимоя қилиш” имконини беради.

“Муҳими шундаки, биз артиллерия ишини Донецкдан узоқроққа, ғарбга сезиларли даражада кўчирдик”, дейди Шойгу.

Ўз навбатида, Украина Қуролли Кучлари Шойгунинг Маринка Россия армиясининг тўлиқ назоратига ўтгани ҳақидаги баёнотини рад этди.

“Ҳозир ҳарбийларимиз Маринканинг маъмурий чегараларида, аммо шаҳар бутунлай вайрон бўлган. Маринканинг тўлиқ қўлга олиниши ҳақида гапириш нотўғри”, дейди Украина Қуролли Кучларининг Таурид йўналиши мудофаа кучлари қўшма матбуот маркази спикери, полковник Александр Штупун.

• Путин
• Россия
• Sergey Shoygu
• Украина