Туркия президенти Ражаб Тоййиб Эрдўғон Стокгольмдаги шов-шувли ҳаракатлардан сўнг Швеция энди мамлакатдан НАТОга ариза бериш учун қўллаб-қувватлашни кутмаслиги кераклигини айтди. Бу ҳақда у кеча, 23 январь куни Вазирлар Маҳкамаси йиғилишидан сўнг маълум қилди.

"Швециядаги ва ҳатто дипломатик ваколатхонамиз яқинидаги бу нопок ҳаракатлар мусулмонларга, умуман, барча инсонларга, барча ҳуқуқ ва эркинликларга нисбатан ҳақорат сифатида қабул қилинади. Сиз террорчиларни қўллаб-қувватлашда давом этасиз ва НАТОга аъзо бўлиш учун қўллаб-қувватлашни кутмоқдасиз. Бу ишламайди. Швеция биздан бу ёрдамни энди кутмаслиги керак”, деди у.

Туркия етакчиси Стокгольмдан террор ташкилотларига қарши курашда Туркия олдидаги мажбуриятларини тўлиқ бажаришини кутишини таъкидлади. "Агар Швеция ҳукумати ҳуқуқ ва эркинликларни шунчалик ҳурмат қилса, улар биринчи навбатда Туркия Республикаси ва барча мусулмонларнинг диний туйғуларини ҳурмат қилишлари керак. Агар бу ҳурматни кўрсатмасангиз, кечирасиз, лекин сиз НАТОга аъзо бўлиш борасида биздан ҳеч қандай қўллаб-қувватлаш олмайсиз”, деди Эрдўған.

Туркия ҳукумати шанба куни Стокгольмда Туркия элчихонаси олдида Қуръоннинг ёқиб юборилишига кескин норозилик билдириб, бу ҳаракатни "ирқчилик" ва "замонавий ваҳшийлик" деб атади. Ҳукмрон Адолат ва Тараққиёт партияси (АКП) раҳбари ўринбосари Нуман Куртулмуш, Туркия терроризмга қарши кураш бўйича Анқара билан имзоланган меморандумни бажармагунча, Швециянинг НАТОга аъзолик аризасини маъқулламаслигидан огоҳлантирди.

11 январь куни Стокгольмда Туркияда террорчи деб тан олинган Курдистон ишчилар партиясини қўллаб-қувватлаш митинги бўлиб ўтди. Акция давомида унинг иштирокчилари Эрдўғонга ўхшаш қўғирчоқни осиб қўйишни саҳналаштирдилар. Бу воқеа ва Швециянинг шов-шувли акцияга алоқадорларни қидиришдан бош тортгани ҳам Анқаранинг кескин муносабатига сабаб бўлди.

• Эрдоған
• НАТО
• Швеция