Куни кеча Бухоро ва Навоий вилояти ўртасидаги Қизилқум чўли ҳудудида ташкил этилган “Стихия” – электрон мусиқа фестивали ўз якунига етди. Унда юртимиз ва хориждан ташриф буюрган 2 мингдан ортиқ электрон мусиқа ишқибозлари ва экологияга эътиборсиз бўлмаган инсонлар иштирок этишди.

Фестивални ташкил этишдан асосий мақсад мамлакатимиздаги экологик муаммоларга жамоатчилик эътиборини қаратиш, ёшларни мусиқага бўлган қизиқишларини ошириш, шу билан бирга, туристлар оқимини кенгайтиришдир.

“Стихия” электрон мусиқа фестивали юртимизда 2017 йилдан буён туризмни ривожлантириш, Ўзбекистонни бутун дунёга танитиш, экологик муаммоларга эътиборни ошириш мақсадида ўтказиб келинади.

Фестивалда эски кийимларни қайта ишлаш натижасида тайёрланган либослар учун эко расталар ташкил этилди. Бундан ташқари, мавҳумлик ичра ўтирган “Космонавт", чиқиндилардан қайта йиғилган “дарахт" ва "Нано лайт гуллари боғи" фестивалнинг ўзига хос рамзига айланди.

Эслатиб ўтамиз, 3 кун давом этган фестиваль Экология ва атроф-муҳитни муҳофаза қилиш ва иқлим ўзгариши вазирлиги, Навоий ва Бухоро вилоятлари ҳокимликлари кўмагида ташкиллаштирилди. 2024 йилда “Стихия” мусиқа фестивалини Мўйноқда ўтказиш режалаштирилган.

• фестиваль
• Lifestyle