Кеча, 17 сентябрь куни “Tesla” компанияси иш бошлаганидан буён беш миллионинчи электромобиль ишлаб чиқарилаётганини эълон қилди. Бу воқеа “Tesla”нинг тўрт миллионинчи электромобили март ойи бошида бутун дунё бўйлаб автомобиль ишлаб чиқарувчи заводларида чиқарилганидан олти ой ўтиб содир бўлди.

Қайд этиш мумкин, Илон Маск бошқарувидаги компания 2008 йилда Британиянинг “Lotus Elice” спорт автомобили негизида “Tesla Roadster” биринчи электр кобриалетни омма эътиборига ҳавола этди ва 12 йилдан сўнг, 2020 йил март ойида ўзининг бир миллионинчи электромобилини ишлаб чиқарди.

Уч йилдан сўнг “Tesla” АҚШ, Голландия, Шанхай ва Берлиндаги заводларида яна 3 миллионта электромобиль ишлаб чиқарди.

Янги қувватларнинг ишга туширилиши туфайли компания 2022 йилда 3 миллионга қўшимча равишда яна 1 миллион автомобиль ишлаб чиқариш учун бор-йўғи етти ой вақт керак бўлди.

Ҳозирда Tesla йилига икки миллионга яқин электромобиль ишлаб чиқариши мумкин, жумладан, янги “Tesla Semi” юк машиналарига ҳам катта умид боғланган. Компания раҳбарияти ходимлар олдига бутун дунё бўйлаб ишлаб чиқариш ҳажмини йилига 20 миллион автомобилгача ошириш вазифасини қўйган. Бунга эришиш учун “Tesla”га тахминан 12 гигафабрика керак бўлади. Компаниянинг янги филиалларини Мексикада қуриш режалаштирилмоқда. Ҳар бир янги корхонани ишга тушириш учун қурилиш бошланишидан то электромобилларни оммавий ишлаб чиқаришгача бир неча йил керак бўлади.

• Ilon_Mask
• Tesla
• технология