Сурхондарё вилояти Сариосиё туманида жойдашган “Тўполанг” сув омборида жорий йил 22 июнь куни янги ишга туширилаётган ГЭС қувурларидан биридаги носозлик сабаб сув миқдори автоматик равишда бошқарилмай қолган ва каналга оқизиб юборилгани ва мазкур ҳолат аакс этган видеотасвирлар маҳаллий аҳоли ўртасида бир муддат ваҳимага сабаб бўлгани хабар қилинган эди.

“Спутник” нашрининг ўзбек таҳририяти “Ўзбекгидроэнерго” АЖ Хавфсизлик ва махсус ишлар бошқармаси бошлиғи Нодир Артикбаевдан  “Тўполанг”даги вазиятга Афғонистонда содир бўлган зилзиланинг таъсири бор ёки йўқлиги ҳақида маълумот олди. 

“Афғонистон жануби-шарқидаги Пактика ва Хост вилоятларида содир бўлган зилзиланинг Тўполанг сув омборига умуман таъсири йўқ. Бу борада, сув омбори мутлақо хавфсиз. Мазкур зилзиланинг Ўзбекистонга, бевосита Сурхондарё вилоятига сезилиш кучи тахминан 3 балл (281 км) ни ташкил этган”, - деган Артикбаев.

Мутахассис, шунингдек, сув омборининг кучли зилзилаларга бардошлилиги 8 баллга тенг бўлиб, мустаҳкам гидроиншоот эканлигини алоҳида таъкидлаган.

Қайд этилишича, Сурхондарё вилояти ва айниқса сув омбори атрофида яшовчи аҳолиси хавфсизлигини таъминлаш мақсадида Тўполанг сув омборида локал даражасидаги хабар бериш ва маълумот (ахборот) етказишнинг автоматлаштирилган тизими яратилган.

Ушбу тизим доирасида қуйидагилар кўзда тутилган:

– “Тўполанг” сув омбори тўғонидан Сариосиё тумани Фавқулодда вазиятлар бўлимигача узунлиги 26 км бўлган оптик толали алоқа кабели тортилган;

– сув омбори тўғонидан 22 км масофада жойлашган аҳоли пунктларигача овозли хабар бериш мосламалари орқали фавқулодда вазият тўғрисида ахборот етказиш тизими билан таъминланган.

“Ундан ташқари вилоят аҳолисига юзага келиши мумкин бўлган фавқулодда вазиятлар тўғрисида огоҳлантириш учун Сурхондарё вилоятининг маҳаллий даражасида хабар бериш ва маълумот (ахборот) етказишнинг автоматлаштирилган тизими узлуксиз режимда ишлайди”, – дея маълумот берган мутахассис.

• Сурхондарё
• Сув омбори
• Тўполанг
• Зилзила